ahötsa_

Sephorak duela egun batzuk jakinarazi du ELAk enpresan dituen bi ordezkarien diziplinazko kaleratzea. Sindikatuak jakinarazi duenez, kaleratze hori egiteko alegatutako arrazoia da grebari eustea, lan-baldintzak negoziatzeko eskatuz, eta horrek dakarren eragin negatiboa, bai ekonomikoa, bai irudiarena.

“Berriz ere, Sephora, urtebete baino gehiago dirauen gatazkan oinarrizko eskubide den grebarako eskubidea urratzen, sindikatzeko askatasunarena, kargu sindikal bat betetzean adierazpen-askatasuna izatearena edo negoziazio kolektiborako eskubidea urratzen ari da. Horretara mugatu da Sephora denbora honetan guztian: eskubideak ukatzea eta eskubide horiek erabili nahi dituztenak isilarazten eta zigortzen saiatzea”, salatu du ELAk.

Sindikatuaren hitzetan, Sephora greba geldiarazten saiatu zen, ELA eta bere bi ordezkariak auzitara eramanez, legez kanpoko greba zela argudiatuz, eta denda eta greba egun bakoitzeko 4.000 euro ordaintzeko eskatuz. Nafarroako Justizia Auzitegi Nagusiak bere garaian erabaki zuen grebaren legezkotasuna.

Horrekin batera, kritika neutralizatzen ere saiatu izan dela gogoratu du ELAK, izan ere urtarrilean 16 eguneko enplegu eta soldata zigorra ezarri zizkien hiru langileri (tartean bi ordezkariei), Sephoren publizitate-kanpaina baten parodia egiten zuen bideo batean parte hartzeagatik. Bideo horretan, enpresaren lan-baldintzak umorez kritikatzen ziren.

Urtebete baino gehiagoko grebaren ondoren, greban dauden langileekin negoziatzera eseri gabe jarraitzen du enpresak. Kaleratzeak baliogabetzeko eta kaleratutako langileak berehala berriz hartzeko eskatzeaz gain, ELA Sephora gatazka honetan zehar izan diren “oinarrizko eskubideen urraketa etengabeak” ordaintzera behartu dezaketen legezko alternatibak aztertzen ari dela iragarri du, kalte-galerengatiko konpentsazioa eskatzea ere baztertu gabe.

ELAk, azkenik, adierazi nahi du kaleratze horiek ez dutela enpresan bizi den gatazka ixten, eta borroka egiten jarraituko dutela enpresako lan-baldintzak hobetzeko.