ahötsa_

Reinosako (Kantabria) 40 urteko behargin bat hil zen bart Irunberriko Acciona enpresako aparkalekuan izandako lan istripuan.

Foruzaingoak jakitera eman duenez, ezbeharra bart 22:58an jazo da, kamioi batek langilea harrapatu duenean. Behargina Irunberritik Bilboko porturaino palak garraiatzeaz arduratzen zen kanpoko enpresa batekoa zen.

Medikua eta anbulantzia bertaratu ziren. Zangozako eta Iruñeko Foruzaingoak ere mobilizatu ziren. Atestatuen taldea istripuaren arrazoiak ikertzen ari da.

Bigarrena Nafarroan, hamargarrena Euskal Herrian
Nafarroan bi aste baino gutxiagoan izan den bigarren lan istripu hilgarria izan da. Otsailaren 25ean 53 urteko beste langile bat hil zen Soraurengo enpresa batean makina birringailu batek harrapatuta. Euskal Herri osoa aintzat hartuta, 2021ean lanean hil den hamargarren behargina da.

Laneko heriotzekin amaitzea lehentasunen artean jartzea eskatzen dio LABek Nafarroako Gobernuari
LAB sindikatutik, elkartasuna eta samina adierazi nahi diete hildako langilearen senideei eta lankideei.
“Langileen heriotzak ez dira halabeharrez edo zorte txarrez gertatzen. Hainbat faktoreren ondorio dira, baina horien artean beti daude lan-baldintzak; enpresen irabaziak, presak, prekarizazioa, azpikontratazioa… lehenesten dituztenak. Noiz arte egon beharko dugu gaitz hori jasaten?”, galdetzen du sindikatuak.

Nafarroako Gobernuari eskatzen diote lehentasunen artean jar dezala lan istripuekin amaitzea. “Baina hori ez da gertatuko eredua aldatu gabe. Langileen bizitza, segurtasuna eta osasuna erabaki guztien erdigunean egongo diren eredu berria behar dugu”, dio LABek.

ELAk ikerketa sakon bat egitea eskatu du istripuaren arrazoiak argitzeko

Nafarroan lan istripuz izandako bigarren heriotzaren aurrean “atsekabea eta haserrea” adierazi nahi ditu ELAk, eta egoera oso larria eta onartezinaren aurrean aurkitzen garela adierazi du sindikatuak. “Nafarroan. 2020an, 11 pertsona hil ziren lan-istripuan, amiantoarekin lotutako gaixotasunengatik edo lanean koronabirusa hartu izanagatik hildako pertsonak zenbatu gabe. 2012. urteaz geroztik, ezbehar-tasa% 30 baino gehiago handitu da, eta Prebentzio Legea onartu zenetik 25 urte igaro ondoren, enpresek urtero milioi bat euro baino gehiago pilatzen dituzte ez betetzeagatiko zigorretan”, salatu du.

Egoera horretan, ELAk patronalari eskatzen dio “lan-baldintzak okertzeko lan-erreformez baliatzeari utz diezaiola, eta plantillen segurtasuna lehenetsi dezala behingoz, onura ekonomikoaren gainetik”. Sindikatu honen ustez, baina, patronala “oso eroso dago” Nafarroako Gobernuak enplegu planei eta elkarrizketa sozialari buruz hitz egiten jarraitzen duelako “enpresen interesen aurkako neurriak hartzeari uko egiten dion bitartean”.

Istripuei aurre egiteko, enpresetatik prekarietatea ateratzea ezinbestekoa dela dio ELAk, eta “horretarako beharrezkoa da ISPLNren eta lan-ikuskaritzaren baliabideak bikoiztea, eta lantokietako segurtasun-baldintzak masiboki kontrolatzea”

Acciona Blades enpresako langileek deitutako mobilizazioetan parte hartzeko deia luzatu dute sindikatuek: gaur 23:30ean eta bihar martxoak 10, 12: 00etan eta 16: 00etan.