Larunbatean bideak batuz, gazteok Bilbora
Azterketa garaia dugu maiatza. Milaka gaztek udaberriko lehen eguzki izpiekin batera liburutegi, ikasgela eta hamaika txoko betetzen ditugu liburuen artean murgilduta. Lan guztia, zenbaki batean kalifikatzeko, horren presioa bizkar gainean sentituz. Gero “saria”: gure lan indarra saldu eta azken izerdi tanta xurgatuko digun merkatu kapitalista.
Irati Sienra, Ernai gazte antolakundeko kidea.
2016-ko maiatzak 27
Gutako askok ezaguna dugu “sari” hori. Full time deituriko ikasleok edo aspaldi
ikasketak utzita ditugunok ere, handik hona gabiltza lau xox miserable lortzeko
enplegurik ziztrinenak onartzen. Kontraturik gabe, praktikaldiekin lanpostuak
ordezkatzen, aldi baterako enplegu bat, bi edo hiru elkarrekin uztartzen… Orainean
biziraunarazi nahi gaituzte. Gazte sumiso, otzan eta isil, etorkizunik gabekoak.
Zurrunbiloaren erdian ordea, komeni da ikasgelatik irten, begiak itxi eta bizi dugun
egoeraren zergatiei erreparatzea. Norbere buruari galdetu ea gauzak aldatzeko prest
gauden. Eta baiezkoa bada erantzuna, egin dugunaren inguruan pentsatu beharko
genuke. Azken hilabeteei erreparatu eta joder, uste baino gauza gehiago gertatu dira
gure Herrian.
Aldaketa soziala aldarrikatu eta bizitza burujabea eraikitzeko gogoa, nahia eta
gaitasuna bildu genituen urrian Alternatiben Herrian. Euskal Herritik kanpo sortutako
borrokek ere oihartzuna izan dute, ezin ahaztu otsailaren amaieran Herrialde
Katalanetako deialdiaren testigua hartu eta Movistar enpresaren aurkako borrokari lotu
ginenekoa. Prekarietateak emakume aurpegia duelako mobilizatu ginen martxoaren
8an, baita borrokarako prest gaudela aldarrikatu Gasteizeko kaleetan apirilean. Ama
lurra suntsituz aberasten direlako, eman genituen pedalkadak aurreko asteko Txirrinka
martxan.
Berriz ikasgelara bueltatzen gara irratiko esatariak dioenarekin batera. Paper batzuk
Panaman eta betiko kontua: aberatsen inpunitatea berriz ere agerian. Pribilejioak eta
pribilegiatuak. Ilegala etxe desjabetzea gelditzen saiatzea da, edo banketxeak pinturaz
zikintzea. Donostian etxerik gabeko herritarrak hotzak jota hiltzea edo patronalak
aurten Euskal Herrian 96 litro odol isuri izana ez da arazo bat. Etika merkea,
boteredunak aberasten jarraitzeko. Sistemak ederki funtzionatzen du.
Egoeraren krudeltasunarekin nahikoa ez, eta gorbatadun jauntxoak aurpegira
barrezka. Semeei Lanbiden lanik ez bilatzeko aholkua ematen Blasco, Urkullu gazteoi
kanpora joateko gonbidapenak luzatzen… Nafarroan eta Ipar Euskal Herrian ere ederki
ezagutzen ditugu aspalditik hauen laguntxoak.
Herri mugimenduarekin batera, tokian tokiko borroketan murgildu gara gazteok. Nahiz
eta argi dugun, gure problematika espezifikoa dela, eta gazte bezala borrokatu eta
gure arazoei aurre egiteko tresnak eraiki behar ditugula. Guk egiten ez badugu inork ez
digulako ezer oparituko, gure kabuz ala hil.
Sistemaren logika borrokatu eta gainditzeko prest dago Euskal Herriko gazte
mugimendua, proiektuak sortuz bidean aurrera eginez. Firestone fabrika okupatuan
bildu ginen urte amaieran, obretan dagoen mundu honetan gazteok ere eraikuntza
lanetan gaudela erakutsiz. Apirilaren 30ean kaleak astindu genituen ehunka gaztek,
baita langileon nazioarteko egunean ere.
Gazte askeak izan nahi dugulako aldarrikatzen dugu burujabetza prozesua, Euskal
Herrian garatu beharreko aldaketa prozesua. Bide horretan, eguneroko iraultza txikien
logikari helduz, bizi baldintzak duindu, balore iraultzaileak garatu, bizi eredu berriak
eraiki, sistemaren logikatik kanpo proiektuak sortu… guzti hauen elkarrekintzaz lortuko
dugu botere hegemonikoa zalantza jarri eta arrakalak sortzea.
Ernaiko kideok, gazte mugimenduarekin batera, eta herri mugimenduarekin
elkarlanean, askapen prozesuaren baitan dugun onena emateko prest gaude.
Maiatzaren 28an ere Bilboko kaleetan elkartuko gara, prekarietatearen aurkako
borrokan pausu bat aurrera eginez eta bideak batuz. Obedientziaren aurrean,
desobedientzia. Sumisioaren aurrean, intsumisioa. Burugabetasunaren aurrean,
burujabetza eta dependentziaren aurrean, independentzia.
Independentzia, sozialismoa eta feminismoa ipar, gazte botereaz Euskal Herria
askatu!
Gehiago
![](https://ahotsa.info/wp-content/uploads/2024/09/GWjLVJjW8AAbLbW-1.jpg)
Euskal Herriko hainbat arraunlari zein arraun munduan dabiltzan 100 bat kidek bat egin dute iganderako Ernaik deitutako mobilizazioarekin
![](https://img.youtube.com/vi/vQFTHZeQGts/hqdefault.jpg)
Iruñerriko gazteek bizi-baldintza duinak eskatu dituzte prekarizazio orokorraren aurrean
![](https://img.youtube.com/vi/5e0TA130qKY/hqdefault.jpg)