ahötsa_

Legeak aginduta, Gobernuak oinarrizko bost gai ditu Erripagaña izeneko lurraldean lantzeko: antolamendua, mugikortasuna, etxebizitza, hezkuntza eta osasuna. Baina sistematikoki ez die beharrezko arreta jarri.

Lurralde antolamenduari dagokionez, inguruko elementu egituratzailea definitu zuen izaki berria, baina benetan Beloso, Mendillorri, Burlata eta Sarrigurengo hiriguneek osatzen duten hiri sareko baoa aprobetxatu baino ez zuen egin. Planeamenduaren hurrengo aldaketetan, eraikuntza bolumena handitu da, besterik ez, zerbitzuak eta ekipamenduak garatu eta sustatu gabe.

Mugikortasunari dagokionez, Nafarroako Gobernuarena da Erripagaña eta Mendillorri banatzen dituen errepidea, oinarrizko zerbitzuetara iristeko bizilagunek zeharkatu behar duten bide-hesi nagusia. Bideari ez zaio irtenbiderik eman, edo emandakoa ez da egokia, sei erreiko Kopenhage kale beldurgarriarekin gurutzatzen den puntuan bezala. Izan ere, duela egun gutxi txirrindulari bat harrapatu zuen kotxe batek. Halaber, txirrindulariek ez dute Berrikuntzaren Hiriko pasabidea zeharkatzerik, Gobernuak bigarren aldiz ezarri batiu bakarrik oinezkontzat dela.

Etxebizitzari dagokionez, Gobernuak sustapen babestuen kopuru handia erabili du lurraldeko ekintzak eta ez-egiteak legitimatzeko. Baita negozio ilunak babesteko ere, hala nola NASIPA bere garaian edo VUSA, Erripagañan eraikiko duen eta euskal administrazioekin izandako tratu batzuengatik susmo txarrak eragin dituen enpresa.

Hezkuntzari dagokionez, Gobernuak erabaki zuen Egunsenti haur-eskola Erripagañara ekartzea, Burlatako uholdeek suntsitu baitzuten. Aurrekontuetan zehaztu zen obrak 2023an hasiko zirela, 2024an amaitzeko, baina aurten zentroaren diseinua baino ez da egingo. Maiatzean, Hezkuntza Departamentuak gezurra esan zion Arartekoari, ziurtatu baitzuen eskola 2024/2025 ikasturtearen hasierarako prest egongo dela. Epe hori ez da beteko, Hezkuntza behar baino beranduago hasi baitzen izapidetzen. Birkokatu beharreko hizkuntza-zentro batzuk eta LHko beste bat ere aurreikusi dituzte auzoan, baina ez UPSak aurreikusten zituen lehen hezkuntzako ikastetxeak.

Osasunari dagokionez, osasun-etxea egiteko dirua bazen 2020ko aurrekontuan, eta aurreikusten zen 2022an amaituko zela. Baina urteotan ez da ezer egin, eta ez da ezer justifikatu, beste toki batzuetan osasun-inbertsioa egin den bitartean. Aurten ez dago aurrekontu-zuzkidurarik, baina Osasun Departamentuak agindu du datozen urteetan egingo dela, 2026an martxan egoteko, eta aurten bertan diseinua lizitatuko duela. Baina hainbeste promesa egin baina ez bete ondoren…

20 urte hauetan kolore guztietako gobernu-taldeak izan dira, eta guztiek ez dute gobernatu Erripagañan. Mendillorrin baino jende gehiago bizi gara, eta ia Burlatan eta Sarrigurenen bezainbeste. Uste dugu garaia dela Gobernuak sortu zuen lurraldearen gaineko ardura bere gain hartu eta zerbitzuak emateko. Gure esperantza da konpromiso hori Gobernuaren hurrengo aurrekontuetan ikustea. Baita lau udalen aurrekontuetan ere.