ahötsa_

Joan den asteartean, maiatzak 3, arratsaldeko 20,30ak aldera, beste lan-istripu hilgarri bat gertatu zen Iruñean. 62 urteko langile bat hil zen bere lantokiko aldagelan. Heriotzaren zergatia ikertzen ari dira oraindik. Maju enpresak azpikontratatutako Nafarroako Ospitalean garbitzen ari zen langilea.

Majuko Enpresa Batzordean babesa eta elkartasuna adierazi nahi diegu Mari Luz Lopezen senideei, hurbilekoei eta lankideei.

Istripu ez-traumatikoak ere lan istripuak dira. Lan-orduetan ez dira kasualitatez gertatzen, lan-baldintzak, presioak eta estresa funtsezko faktoreak dira istripu kardiobaskularretan, eta horiek bihurtu dira lan istripuen kausa handienetako bat.

Laneko heriotza guztien atzean, langile-klasearen lan-baldintzak eta bizi-baldintzak daude. Kasu horretan, langileak egunak zeramatzan esaten ez zegoela ondo, eta, hain zuzen, hurrengo egunean ordua zuen bere medikuarekin.

Urteak daramatzagu prekarietateak hil egiten duela salatzen, eta prekarietatea lanera gaixorik joan behar izatea da, soldatatik dirurik ken ez diezazuten, langileek hilabete amaierara iritsi ahal izateko. Eta azpikontrata batean lan egitea ere prekarietatea da, eta hori adibide argia da; izan ere, azpikontratatutako langileek Osasunbideak zuzenean kontratatutako langileek baino baldintza okerragoak dituzte, hala nola gaixo daudenean %100a ez kobratzea.

Lan eta bizitza duin bat izateko eskubidea dugu, gure lanetik osasuntsu eta bizirik itzultzeko eskubidea dugu. Enpresa Batzordean argi daukagu mobilizazioa eta borroka direla gaitz honekin amaitzeko ditugun arma bakarrak. Eredu aldaketa bat behar dugu, non langileen osasuna eta bizitza erdigunean egongo den.

Istripua salatzeko, Majuko Enpresa Batzordeak Majuko eta Ospitale Guneko langileei dei egiten die hurrengo astelehenean goizeko 10etan Ospital Gunean (Irunlarrea kalea) egingo den kontzentrazioan parte hartzeko.