Non Dago Mikel? Mexikora helduko da Guadalajarako Nazioarteko Zinema Jaialdiaren eskutik

Mikel Zabalzaren kasuan sakontzen duen film luze dokumentalak Aipamen Berezia jaso zuen Donostiako Zinemaldian eta orain Mexikon nazioarteko ospe handiko lehiaketetan ibilbide oparoa hasiko du.

2021-ko abuztuak 20

Amaia Merino eta Miguel Angel Llamasek zuzendutako Non Dago Mikel? dokumental luzea Guadalajarako (Mexiko) Nazioarteko Zinemaldiaren 36. edizioko Sail Ofizialean lehiatuko da urrian. Mikel Zabalza autobus-gidariaren desagerpenaren kronika (1985eko abenduan agertu zen hilda, Guardia Zibilak atxilotu ostean), izen handiko nazioarteko lehiaketen zirkuitoan egindako ibilbideari ekingo dio.

Amaia Merino zuzendarikidearen ustez, Non Dago Mikel? filmak kategori handiko zinemaldi baten Sail Ofizialean parte hartu izanak filmaren kalitatea eta jorratzen duen gaiaren interesa eta gaurkotasuna erakusten ditu. Bestalde, Zabalza familiak egiaren, justiziaren eta erreparazioaren alde egin duen borroka ezagutarazteko aukera paregabea dela erantsi du Miguel Angel Llamas “Pitu”k.

Espainako Estatuan aurten gehien ikusi den filmetako bat izan dela dio Izaskun Arandiak, filmaren ekoizleak. Gainera, mundu-mailako estreinaldia Donostiako Nazioarteko Zinemaldian izan ondoren, FICGko hautaketari esker mugak gainditu eta Mikelen istorioa Mexikoko publikoarengana iristeak ilusio handia egiten digu.

Donostia Zinemaldiaren 68. edizioko Euskal Zinemaren Irizar Sariaren epaimahaiak Aipamen Berezia eman zion filmari bere nazioarteko premièrean. Gainera, Bizkaiako Aldundiak memoria historikoa jorratzen duten dokumental-formatuko lanak saritzen dituen Lauaxeta 2020 saria jaso zuen filmak, ikus-entzunezkoen sailean.

IZAR Films eta Ahotsa.info-k ekoitzitako filmak, garaiko artxiboko materiala eta kasuarekin zerikusia zuten pertsonen egungo testigantzak uztartzen ditu, eta 15.000 ikusle baino gehiago eta ia 80.000 euro bildu dituen mugarri bihurtu da, Atera Films-en eskutik zinema-aretoetan estreinatu ostean.

Gehiago