Nafarroako erdialdean Abiadura Handiko Trenak kalteturiko eremuak ezagutzeko mendi martxa
Atzo, igandea, mendi martxa bat egin zen Tafalla eta Campanas artean hasi berri den AHTren azpi-tarteak kalteturiko eremuak ikusteko, ibilbideko hainbat lekutan izandako aurkikuntza arkeologikoei buruzko azalpenak emateko eta obra horiek gaitzesteko.
2024-ko apirilak 29
Martxa goizeko 9etan abiatu zen Tafallako Foruen plazatik. Lehenengo geldialdia Gariposan egin zuten, erromatar castellum aurkitu zuten lekuan. Hori dela eta, obrak gelditu egin dituzte orain arte, trazadura aldatzeko. Leku horretan indusketa-lanak egin dituen arkeologia-enpresak uko egin zion ikerketa-prozesua azaltzeko gonbidapenari, eta martxaren antolakuntzak agerian utzitako castellum-aren ezaugarriak, zatiak eta funtzioak azaldu zituen.
Valdetinako iturrian hamaiketako autogestionatu bat egin ondoren, hurrengo geldialdia Garinoaingo haritz monumentalaren inguruan egin zuten taldeko argazkia ateratzeko. Jarraian, ibilaldia Santa Zezilia baselizan gelditu zen, zeina erromatar aurreko baskoi kastroaren erdian kokatuta dagoen. Puntu horretan, AHTren trazadura oso hurbil dago, eta lanen aurretik hainbat azterketa arkeologiko egin dira, Muru Artederretako erromatar aurreko herrixkaren inguruan eta AHT tarte horrek kalteturiko beste leku batzuetan bezala. Leku horretan ere, antolakuntzak herrixkari eta egindako aurkikuntzei buruzko azalpenak eman zituen, indusketa-lanak egin dituen beste enpresa baten ezezkoaren ondorioz.
Martxa Garinoainen amaitu zen, Murugain Elkartean. Bertan, martxistek indarrak berreskuratu zituzten bazkari handi baten bidez giro ezin hobean.
AHT Gelditu! -k gogoratu du AHTren aurkako hurrengo hitzordua maiatzaren 11n izanen dela, Iruñean.
