Ernaiko manifestazio bat debekatzea eskatu du Toquerok (UPN), baina Ordezkaritzak ez du motiborik ikusten

Europa Pressek gaur goizean argitaratu duenez, Alejandro Toquero Tuterako alkateak gutun bat bidali dio Nafarroan Espainiako Gobernuak duen ordezkariari, Ernaik Tuteran deitutako manifestazio bat debekatzea eskatzeko. Europa Pressen arabera, Alejandro Toquero Erriberako UPNko alkateak manifestazioa debekatzeko eskatu du, "ordena publikoan aldaketak egon daitezkeelako eta, ondorioz, pertsonak edo ondasunak arriskuan egon daitezkeelako". Era berean, hainbat polizia-kidegori "egokitzat jotzen diren prebentzio-neurriak hartzeko eta Tuteran poliziaren presentzia indartzea baloratzeko" eskatu die.

2026-ko urriak 8

Bere eskaeran, Toquerok antzeko ezaugarriak dituzten duela gutxiko beste deialdi batzuk aipatu ditu, balizko liskar eta gorabeherengatik duen kezka justifikatzeko. Hala ere, agentziak zabaldutako gutunaren zatiek ez dute mehatxurik zehazten Tuterako Ernairen deialdiarekin lotuta.

Espainiako Gobernuak Nafarroan duen Ordezkaritzak argudiatzen du ez dagoela horren aurkako polizia-txostenik, eta biltzeko eskubidea ez dagoela aurretiazko baimenaren mende. Beraz, ez du ikusten deialdia debekatzeko arrazoirik.

Larunbat honetarako, urriaren 10erako, 19:00etan, deitu den mobilizazioa Ernaik Tuteran antolatu dituen jardunaldi politikoen parte da. Gazte erakundeak Nafarroa hegoaldeko gazte antifaxista, feminista eta euskaldunen arteko loturak bildu eta estutu nahi ditu, eztabaida politikoa eta mobilizazioa uztartuz.

Ernaik faxismoaren eta espainolismoaren aurrerapena geldiarazteko beharrean kokatzen ditu jardunaldi hauek. Erakundeak lurralde banaketa estrategia bat salatzen du, zonifikazio linguistikoan, garraio publikoaren gabeziak, bidesariak eta Iruñea eta Tuteraren arteko liskarrak identifikatzen dituena. Horren aurrean, Nafarroa batua, euskalduna, burujabea, feminista eta antifaxista aldarrikatzen du.

Gehiago