ahötsa_

AHTak isuritako gasek berotegi eragina dute eta aldaketa klimatikoa areagotzen dutela azpimarratu nahi izan dute azpiegitura honi askotan profil berdea ezeztatzeko. “Batzuek kontrakoa badiote ere AHTa ez da inolaz ere ekologikoa. Izan ere eguratsa gehiago berotzen du”, eta hainbat arrazoi eman dituzte:

“Hasteko, bioaniztasuna gordetzen eta CO2 isurketak irensten zituzten ehundaka hektarea baso eta bailara desagerrarazi ditu. Ibilbidean zehar, plataformak, pistek eta tunelek behar duten porlan kopuru itzela ekoizteko erabili den makinaria erraldoiak CO2 isuri du etengabe. Hormigoiaren osagaiak diren harriak eta burnia lortzeko eta garraiatzeko ere tonaka CO2 isuri da”, esan du Mugitu-k.

Bigarrenez, AHTak energia kontsumo “neurrigabea” duela gogoratu dute. “Halako tren batek orduko 300kmko abiaduran dabilenean 25.000 bizilaguneko herri baten adina energia xahutzen du. Izan ere, abiadura handitzeak kontsumo energetikoa esponentzialki haztea dakar. AHTa zentral nuklear zein Castejongo bezalako zentral termikoez elikatuko da. Zentral hauek karbono dioxido (CO2) eta karbono monoxido (CO) kopuru altua isurtzen dute eguratsera, euri azidoaren eragile. Ebroko uren beroketa ere eragiten dute errefrigerazioan erabiltzen baitute”.

Egun dauden eguzki eta haize poligonoek eta proiektatuta daudenek ere AHT elikatuko dutela ere gehitu dute. “Hauek ere nekazal eta naturguneak industrializatu eta suntsitzen dituzte.”, salatu dute

“Aldaketa klimatikoa kapitalismo tekno-agro-industrialaren ondorio zuzena da eta AHTa bere ikurra. Biak suntsitzen dute behar dugun bioaniztasuna. Baina AHT ez dute amaitu. Garaiz gaude gelditzeko eta lurraldearen suntsiketa galarazteko”, ohartarazi dute.