PSNren Zuzendaritzak eledun sozialisten adierazpen euskarafoboak babestu ditu
Eguesibarko UPNko alkatea euskara ez dakitenak diskriminatuak daudela eta Orkoiengo alkate sozialista Alejandro Lopezek euskalduna izatea pribilegio bat dela esan eta gero, PSNko beste hautetsi batzuek euskara sustatzearen aurka adierazpen gehiago egin dituzte, hala Eguesibarren nola Tafallan. Ingurumari horretan, PSNren zuzendaritzak Orkoiengo alkatea babestu egin du.
2024-ko urtarrilak 25
PSNren Eguesibarko udal taldeko eledun Mikel Bezunarteak gazteentzat gaztelaniazko jarduera gehiago antola ditzan eskatu dio UPNren udal aginte taldeari.Gogoratu behar da Xuriñe Peñas Eguesibarko alkateak duela aste batzuk euskararen inguruko hitz polemikoak bota zituela udal batzan.
Bezunartearen arabera, otsailetik apirilera euskarazko bederatzi jarduera programatu dituzte eta gaztelaniazko bakarra. “Euskarazko eskaintza ez zaigu handiegia iruditzen, baina gaztelaniazkoa murritzegia da”, azaldu du.
Tafallan, administrari laguntzaile bati C1a eskatzearen aurka
Tafallako Udaleko osteguneko osoko bilkuran plantilla organikoa bozkatuko dute, eta PSNk horren aurka eginen du, EH Bilduren udal aginte taldeak administrari laguntzaile plaza batean euskarazko C1 maila eskatuko duela eta.
PSNren eledun Esther Isoren arabera, Tafallan herritarren %8 soilik mintzatzen da euskaraz. “Euskara meritu moduan aintzat hartzearen alde gaude, baina baldintza moduan ezartzearen aurka”.
PSNren Zuzendaritza, Orkoiengo alkatearen alde
Ingurumari honetan, PSNk ohar bat plazaratu du eta udal hautetsion jarrerak norbanakoenak diren edo alderdiaren estrategia baten aitzinean gauden argitzeko tenorean lagungarria suerta daiteke.
Izan ere, ohar horretan, PSNk Orkoiengo alkate Alejandro Lopez babestu egiten du. Gogoratuko denez, Lopezek, herriko ludotekaren kontura, esan zuen haur euskaldunak euskarazko zein gaztelaniazko jardueretara joan daitekeenez, ez garela eskubidez ari baizik eta pribilegioz.
PSNren arabera, “haren adierazpenak testuingurutik kanpo atera dituzte haren aurkako eraso pertsonal interesatua gauzatzeko” eta “horrek ez du bizikidetza sustatzen”.
Alderdi sozialistak halaber nabarmendu duenez, “Orkoiengo errealitate soziolinguistikoan euskarazko zerbitzuen eskaera gaztelaniazkoena baino askoz txikiagoa da”.
Iruñean UPNren aurkako eta EH Bilduren aldeko zentsura mozioaren alde egin eta gero, PSN ez ote den ari bere zenbait boto emaileren aitzinean bere burua zentratu nahian.
Larunbatean, manifestazioa Orkoienen
Testuinguru honetan, larunbata honetan, Euskal Herrian Euskaraz taldeak deituta, euskararen aldeko manifestazioa eta ekitaldia eginen du Orkoienen. Udalerri honetan dagoen Euskara Ordenantza aldatzearen aurka azalduko dira euskaltzaleak, izan ere, PSNk gidatzen duen Udal taldeak murrizketak egin nahi ditu euskarazko zerbitzuetan.
Gehiago
