ahötsa_

Antolatzaileen arabera, PAI programak estresa eragiten du ikastetxeetan eta kritikatu dute administrazioak ez duela “IIP-PAI atzean utziko lukeen Hizkuntzen Tratamendu Integraturako sistemarik ezarri”. Honen ordez, Nafarroako 100 ikastetxe baino gehiagotan eta 50 herri baino gehiagotan oraindik derrigorrezkoa da IIP-PAI programa.

Otsailaren 3an bideoforum bat egingo da, “PAIren Iruzurra” izenburupean. Bertan, “La chapuza del bilingüismo (Madrid, 2004-2020)” dokumentala proiektatuko da, eta, ondoren, solasaldi bat irekiko da bi hizlarien artean: dokumentalaren zuzendaria, Paco Serrano irakasle madrildarra, eta Richard Weyndling kazetari eskoziarra, ingeleseko irakasleen prestatzailea izandakoa Iruñean.

Bideoforum horretan Madrilgo ingelesezko programa elebiaren eta Nafarroako PAIren arteko antzekotasunak izanen dira hizpide. Horiek inguratu dituen marketina, irakasleen eta familien desengainua, eragin dituen arazoak eta hori guztia sostengatu duen ideologiaz hitz egingo da. Halaber, azpimarratuko da “atzerriko hizkuntzak beste modu batean ere ikas daitezkeela, gainerako curriculum-arloak kaltetu gabe”.

Otsailaren 10ean, Gemma Martínezek, Castejongo eskolako zuzendariak parte hartuko du. Beste autonomia erkidego batzuetako ikastetxe askotan gertatu bezala, Castejongo ikasleak “PAItik askatzea” lortu duen Nafarroako lehen ikastetxearen esperientziari buruz hitz egingo du, «PAItik ere ateratzen da, ez etsi» lelopean.

Bere ikastetxeak jarraitutako prozesua azalduko du: Eskolaren borondatearen aurka programa horretan sartzera behartu zutela, talde pedagogikoak programa uzteko emandako urratsak edota PAItik ateratzeko baimena jasotzeko egindako legezko ibilbide luzea.