ahötsa_

Euskaraz bizitzearen aldeko hautuari behar duen bultzada emateko eguna  antolatu du Euskal Herrian Euskaraz-ek. "Euskaraz Bizi Eguna, norbanako zein komunitate, euskaldunok sasi artetik salto egin eta garenaz harro gaudela, euskaraz bizi nahi dugula erakusteko ekinaldia; herri euskaldunaren eta euskararen alde egotetik harago, horren alde egiteko prest gaudela adierazteko".

Sei urtez bide egin ostean Hizkuntza Eskubideen Eguna atzean utzi eta Euskaraz Bizi Eguna antolatzeari ekin zion EHEtik. Aurten seigarrenez antolatu duten egitasmoak, Etxarri-Aranatzen hasi zuen ibilbidea, umiltasun handiz. Deialdiarekiko atxikimendu zabalak eta honen inguruan sortzen joan den mugimenduak bultzatuta, Euskaraz Bizi Eguna dimentsio zabalagoa hartzen hasi zen, Gernika-Lumon ospatutakoak frogatu bezala. Ondoren, Donostia bezalako hiriburu batera egin zuen salto ekitaldiak. Nafarroa Garaiko ekialdera gero, Agoitzeraino. Iaz, Gasteizera… eta, aurten, Otxandio izango da euskaraz bizi nahi duen herriaren erakusleiho, apirilaren 18an.

"Otxandio, herri euskalduna. Euskararen arnasgune txikia eta euskaldunon babesgune handia. Euskararen alde egoteaz gain, euskararen alde egiteko prest dagoen herria da otxandiarrena. Eta horregatik aukeratu dugu, beste gauza askoren artean, aurtengo Euskaraz Bizi Eguna hartzeko", azaldu du Nestor Estebanek.

"Euskaraz bizitzea gure esku dago, baldin eta hiztun aktiboak bagara. Geldirik bagaude, isil-isilik, akabo. Mugitu nahi duenak, norabait iritsi nahi duenak, dagoen lekutik urrats bat harago joan beharra dauka. Egotea ez da nahikoa; egin egin behar dugu", adierazi du EHE-ko kideak.

Euskaldun eta euskaltzale guztiei dei egin diete apirilaren 18an Otxandiora hurbildu eta euskararen alde egotetik euskararen alde egitera pasatzeko.