ahötsa_

Urte hasieratik daude pediatria zerbitzurik gabe Leitzako Osasun Etxean eta Nafarroako Gobernuarekin harremanetan jarri arren, salatu dute: «inongo konponbiderik ez digute ematen». Leitzaldeko familia askok egoera zailak bizi dituztela azaldu dute: «ohiko gaixotasunez gain, haur jaio berriei ez zaizkie horren ugariak diren mediku azterketak egiten eta gaixotasun kronikoak dituzten haurrei ez zaie jarraipenik egiten». Herrian pediatra ez izateak, gaixo jartzen diren uneoro haurrak Iruñera eraman beharra dakar: «lekualdatze horrek, familientzako denbora (badakigu noiz goazen baina ez noiz gatozen bueltan), logistika (lanetik libratzea, beste haurrak non utzi pentsatzea eta izatea…) eta gastu ekonomikoak (kotxea, erregaia, aparkamentua…) suposatzen ditu». Gainera, Iruñean larrialdi zerbitzuetan haurrak aldiro mediku desberdin batek behatzen ditu: «horrek haurren jarraipena bete betean oztopatzen du».

Egoera onartezina dela iritzita, mobilizazioekin segitzeko asmoa dute: «ez dugu egoera hau onartuko eta borrokan jarraituko dugu egoerari konponbide duin bat eman arte». Horretarako, herriaren babesa behar dutela ere nabarmendu dute: «funtsezkoa da egoera honi guztion artean aurre egitea! Haurrik gabe herririk ez dagoelako. Ez gara nolanahi konformatuko, lanean eta borrokan jarraituko dugu».

Gaur astelehenean, Vianako Printzea ospitalearen aurrean eginen dute, 11:00etan. Eta apirilaren 27an Leitzan egitekoa duten Udaberri festa baliatuta, argazki erraldoia aterako dute 11:00etan plazan.