ahötsa_

Josefina Arregui Klinika Psikogeriatrikoko langileek duten hitzarmen propioa 2022ko abenduaren 31n amaitu zen. 2023an Enpresa Batzordeak aurkeztutako bi puntu negoziatu behar ziren, soldatei eta lanaldiari dagozkienak, 2024ari hasiera emateko hitzarmen osoa eguneratuta. Hala, 2023. urterako % 3,5eko soldata-igoera eta urteko lanaldia 1.651 ordura jaistea proposatu zuen Batzordeak, ordu horiek gainditzen dituzten pertsonen lanaldia 1.710 ordukoa delako. Baina enpresako zuzendaritzak jakinarazi du ez dituela proposamen horiek onartzen.

Horren aurrean, langileek erosteko ahalmena mantentzeko soldatak % 3,5 igotzea “ez da gehiegizkoa” uste dute, eta lanaldiak murriztea “oinarrizkoa eta beharrezkoa” dela adierazi dute. “Egoeraren adibide argia da sektore publikoan mota horretako klinikek eta zentroek 1.592 ordu lan egiten dutela, guk egiten dugunaren oso azpitik”, gehitu dute.

“Ondorioz, eta azaroaren 30ean egindako greba feminista orokorrarekin hasitako mugimenduarekin jarraituz, zainketen eskubideen alde, eta bereziki kontuan hartuta gure lan zentroa oso feminizatua dagoela eta zaintza-lanak etxetik kanpo zein etxean egiten dituzten langileez osatua dagoela, Josefina Arregui Klinika Psikogeriatrikoko plantillak eskatzen du kontuan har daitezela gure eskaerak 2023ko hitzarmena sinatzeko soldatari eta lanaldiari dagokienez, eta 2024rako hitzarmen berrian lan egin dadila lan-baldintza duinen alde, gure eskubideen alde eta gure osasun fisiko eta mentalaren alde”, adierazi du Enpresa Batzordeak.

Langileen eskakizunak betetzen ez badira, 2024ko urtarriletik aurrera hainbat mobilizaziori hasiera emango diete.