ahötsa_

Euskararen Gizarte Erakundeen Kontseiluak ekainaren 4rako deitu duen manifestazioarekin bat egin dute jada Nafarroako hainbat eragile sozialek. Orain dela urtebete, esparru desberdinetan lanean diharduten eragile sozialek bat egin zuten Nafarroan aldaketa eman beharraren aldarrikapenarekin. Urtebete igarota, berriz ere batu dira euskaraz bizi nahi dugulako euskarari bide eman behar zaiola aldarrikatzeko.

“Ez gaude orain dela ustebete desio genuen egoeran. Azken egunetako gertakariek, gainera, are nabarmenago utzi digute hori. Ez dugu oinarri sendorik euskaraz bizi nahi dugun herritarrok gure nahi hori egikaritzeko. ETB ikusteko aukera zapuztu digute. Herritarrek egindako lan eskergari esker lortu genuen Iruñeko 17 haur eskoletatik lauk (aurretik bi bakarrik ziren) euskarazko eskaintza egitea eta guraso baten salaketa bere eginez auzitegiak bertan behera utzi du erabakia. Herritarren eskaera eskaintza baino askoz ere handiagoa izatea ez dute aintzat hartu”.

Deitzaileen esanetan, “euskararen nomalizazioaren aldeko ausartak hartzeko garaia da, jauzia egiteko garaia da” eta eragile sozialak ere euskarari bide emateko bultzada eta prestutasuna erakutsi nahi dira manifestazioan.

Hizkuntza-eskubideen bermeari begira erabakiak hartzen direnean batzuek erakutsi duten jarrera ezkorra eta batzuetan oldarkorra ez dutela ulertzen adierazi dute. Bide honetan euren ekarpena egingo dutela ere adierazi nahi dute eragile sozialek. “Guztioi dagokigulako euskararen normalizazioan urratsak ematea eta hauek eman daitezen bultzada ematea. Hori ere erakutsiko dugu manifestazioan”, ekainaren 4an, 17:30ean Golemetatik abiatuko dena.

Jada, Administrazioan Euskaraz, Ene Kantak, Gora Iruñea, Donibaneko Auzo Elkartea, EH 11 kolore, SF 78 Gogoan, Barañaingo Haizea Elkartea, Sanduzelai Peña eta Irrintzi Peña dira atxikimendua eman duten eragileak. Aldarrikapenarekin bat egiten duten gainontzeko eragile sozialek, euren atxikimendua helarazi dezakete honako helbide elektronikoaren bitartez: komunikazioa@kontseilua.eus.