Iruñeko Udalak bi hilabeteko epea du Donejakue Bideko parkearen errotulua ele bitan jartzeko
Iruñeko Udalak Donejakue Bideko parkearen errotulua erderaz bakarrik jarri ondoren, Administrazioan Euskaraz Taldeak errekurtsoa jarri zuen. Nafarroako Administrazio Auzitegiak arrazoia eman ondoren, udalak bi hilabeteko epea izango du errotulua ele bitan jartzeko.
2023-ko irailak 26
2022an, Administrazioan Euskaraz Taldeak, Nafarroako Administrazio Auzitegian errekurtsoa jarri zuen Iruñeko Udalak erdara hutsean jarri zuelako Donejakue Bidearen parke berriaren errotulua. Nafarroako Administrazio Auzitegiak arrazoia eman zien, Iruñeko Udalak Euskararen Ordenantzaren kontra egin baitzuen. Orain, ebazpena betearaz dadila eta errotulua ele bitan jar dezala eskatu dute, hala agindu baitio NAAk Iruñeko Udalari. Eta beraz, Iruñeko Udalak bi hilabeteko epea izango du Donejakue Bideko parkearen errotulua ele bitan jartzeko.
Administrazioan Euskara Taldeak zabaldutako prentsa oharrean azaldu duenez, Iruñeko Udala ebazpena ez betetzen saiatu da, errekurtso bat jarria duela argudiatuz. Eta egia izan arren, ebazpen baten betearazpena eteteko ez dela aski aldarrikatu du; izan ere, errekurtsoa jartzearekin batera betearazpenaren etetea eskatu behar zuen, eta, NAAk dioenez, “ez da jaso ez alegatu ere bide judizialean erabaki denik etetea NAAren Ebazpena”. Bestalde azaldu dute, dirudienez, Iruñeko Udalak iradoki duela Nafarroako Gobernuak udalen autonomia urratzeko erabiltzen duela Nafarroako Administrazio Auzitegia. Horren aurrean, NAAk oroitarazi dio “Nafarroako Administrazio Auzitegia dela Nafarroako eskumen historiko batek babestutako foru-erakundea (kasu berezia Espainiako ordenamendu juridikoan), eta autonomia funtzionalez diharduela”. Eta gehitzen du: “Defendatu nahi bada Nafarroari kentzea foru-eskumen historiko hau, proposamena ez zaio Administrazio Auzitegi honi zuzendu behar, baizik eta Nafarroako Parlamentuari”.
Gehiago
