ahötsa_

15 kolektibo baino gehiagok osatzen duten kultur koordinatzaileak urtero bezala antolatuko ditu auzoko jaiak. Aurtengo jaietarako egitarauak 50 ekitaldi baino gehiago izanen ditu, kultur astearen eta auzoko jaien artean banatuta, apirilaren 22tik 27ra, alegia. Besteak beste, konpartsaren eguna, berbenak, emakumeentzako zumba klaseen II. edizioa, azken urtean jaiotako pertsonei zapiak ematea eta kaldereteak. Eta aurten, lehen aldiz, gurpildun zezenen entzierroen ordez bisonteen uxaldiak izanen dituzte. Izan ere, Adardunak Kolektiboak entzierroen ohitura aldatu nahi izan du eta animalia horiek torturara bideratzen ez diren beste batzuengatik aldatu. Bestalde, jaien koordinazio gunetik azaldu dutenez, Larunbateko kontzertuak beti apustu garrantzitsua izaten dira, aurten, Maruxak taldearekin adibidez.

Jaiak urtean zehar auzoan jarduerak egiten dituzten elkarte eta kolektiboek beren sorkuntzak eta ikastaroetan egindakoaren laginak kalera ateratzeko datak direla azaldu dute; hiriko dantzak, erakusketak, musika-jaialdiak eta abar. Auzoetako jaiak kulturarako eta aniztasunerako aberasgarritzat jotzea, aintzat hartzea eta balioetsi nahi dituzte, auzokideen topagune eta lankidetzarako eta gozamenerako gune gisa.

Iruñeko Udalari eskatu diote auzoetako jaiak babestuak izan daitezela, azpiegitura eta baliabide gehiago ematen jarrai dezala eta horiek egiten lagun dezala. Jaien koordinazio gunetik adierazi dute, ez dela logikoa jaiak antolatzen dituzten pertsonek hamarnaka ordu inbertitu behar izatea, Sanduzelai (12.000 biztanle) baino askoz txikiagoa den Nafarroako beste edozein herritan Udalak bere baliabide ekonomiko eta giza baliabideekin ematen dituen azpiegiturak prestatzen dituenean. Eta horregatik, kultur Koordinakunde batek kultura antolatu behar duela azpimarratu dute, eta ez azpiegiturak. “Norabide onean ari gara urratsak ematen, eta hor aurkituko ditugu erakundeak eta herri mugimendua, baina ahaztu gabe auzoetatik egiten den lan guztia borondatez egiten dela eta Udalak gure auzoko kale eta plazetan kultur ekitaldi guztiak erraztu behar dituela” gehitu dute.

Azkenik, azpimarratu nahi izan dute, jaiak aurrera atera ahal izateko, kolektibo ezberdinek eta auzokideek borondatez egiten duten lana. Saltokiak eta auzotarrak baitira beren ekarpen ekonomikoekin hori posible egiten dutenak.