ahötsa_

Etxebizitza eskubidearen alde eta higiezinen negozioaren kontrako Estatu espainolaren mailako mobilizazio eguna izanen da larunbatean. Lurralde ezberdinetako hirietan izanen dira manifestazioak, eta Euskal Herrian mobilizatuko den sindikatu bakarra Etxebizitza Sindikatu Sozialista izanen da. Izan ere, gainontzeko sindikatuek “agenda propia” lehenstea erabaki dute eta ez dute kalera ateratzeko deia egin.

Etxebizitza sindikatu honen arabera, mobilizatzeko hamaika arrazoi daude. Azaldu dutenez, “krisiak eta langile klasearen pobretzeak zeharkatzen du bizi dugun garaia”, eta “etxebizitzaren arazoa pobretze prozesu horren adierazle argienetako bat da”. Era berean, arazoaren erroa higiezinen negozioan dagoela adierazi dute; izan ere, “errentagarritasun handiko merkatua denez, geroz eta jabe eta espekulatzaile gehiagok jarri dute arreta harengan”, eta horrek arazoa okertu besterik ez luke eginen: “prezioak igotzea, etxegabetze kopuruak gora egitea, maizterrak juridikoki geroz eta babesgabeago egotea, desokupazio enpresak ugaritzea, edota arrazakeria gailentzea higiezin-merkatuan”.

Egoera horren aurrean, antolatzaileek instituzio publikoetatik hartzen diren neurriak kritikatu dituzte. Presio soziala handitzen ari bada ere, uste dute administrazioetatik “jabe handiei eta higiezinen sektoreari mesede egiten dieten neurriak” onartzen jarraitzen dutela. “Erreforma sozial” gisara aurkeztu arren, “etxebizitzaren merkatua gutxiengo batentzat errentagarria den negozio izateko laguntzen” amaitzen dutela iritzi diote. Kritikatu dituzten politiken artean daude etxejabeentzako % 100eko zerga salbuespenak, eraikuntza enpresa pribatuentzako finantzaketa publikoa, etxejabeen poltsikoetan bukatuko luketen alokairurako laguntzak eta ordaintzen ez duten maizterrengandik “errentariak babesteko” aseguru publikoak sortzea.

Sindikatuak adierazi du etxebizitzaren arazoari aurre egiteko edozein neurri eragingarrik bi baldintza bete behar dituela: “lehenik eta behin, gizarte mobilizazioaren ondorio izan behar du; bigarrenik, higiezinen negozioaren kontrakoa izan behar du, ez hura indartzekoa”. Horregatik, uste dute ez dela espero behar “egiazko irtenbiderik” enpresaburu eta politikari profesionalengandik, “etxebizitzaren merkatuaren errentagarritasunaren zaintzaileengandik”, eta presio sozialak bakarrik eragin ditzakeela aldaketa eraginkorrak eta iraunkorrak.

Azkenik, nabarmendu dutenez, “etxebizitzaren arazoa desagerrarazteko modu bakarra etxebizitza merkantzia bat izango ez den eta baliabideak gizarte premien oinarrien arabera planifikatuko diren gizarte bat eraikitzea da”. Horretarako, mobilizazioaren eta borrokaren garrantzia azpimarratu dute, “enpresaburu eta politikari profesionalen promesak alde batera utzita”.

Bestetik, “etxegabetze guztiak bertan behera uztea” eskatuko da manifestazioan. Emandako datuen arabera, 20 etxegabetze prozesu baino gehiago daude martxan Nafarroan.

Zentzu horretan, “alderdi aurrerakoein hipokresia” salatu dute, “etxegabetzeak geldiarazi izanaren domina zintzilikatu zutelako, baina haiek ezarritako moratoria zirrikituz beteta dago”. Gogorarazi dute moratoria indarrean egon den bitartean bide judizialetik egindako etxegabetzeen % 70 inguru exekutatzen jarraitu dela. EAEn eta Nafarroan ia 4.500 etxegabetze gauzatu dituzte neurria onartu zenetik; “batez beste, 5 etxegabetze 2 egunetik behin”.

Antolatzaileek nabarmendu nahi izan duten beste puntuetako bat “etxebizitza eskuratzeko filtro arrazistak ezabatzea” da. Haien ustez, “pertsona arrazializatuak eta migratzaileak” dira etxebizitzaren arazoa modu gordinenean pairatzen dutenak, eta askotan etxerik gabe, etxean pilatuta edo etxegabetuak izateko etengabeko mehatxupean daudela.

Joan den martxoaren 21ean, Arrazakeriaren eta Xenofobiaren aurkako Nazioarteko Egunean, hain zuzen ere, Euskal Herriko Etxebizitza Sindikatu Sozialistak hainbat higiezin-agentzia eta “alokairu seguruko” egoitzen aurka egin zuen, etxeak nori alokatu edo saldu erabakitzeko orduan ezartzen dituzten filtro arrazistak salatzeko. Era berean, Donostiako manifestazioarekin bat egin dute arrazakeriaren aurka lan egiten duten hainbat eragileek, gazte kolektibo eta gizarte langileek.

Iruñerriko Etxebizitza Sindikatu Sozialistak autobusak antolatu ditu apirilaren 5ean Donostiara joateko. Txartelak Gallego (Alde Zaharra), Ezpala (Iturrama) eta Orreaga (Burlata) tabernetan eros daitezke, edo esindikatua.irunerria@gmail.com. helbidera idatziz.