ahötsa_

Burlatako Gobernu taldeak (EH Bildu, Zurekin Aldatu eta Geroa Bai) ia urtebete darama Gaztetxeko ordezkariekin bilerak egiten, eta udal lokal bat lagatzeko balizko hitzarmen bat lantzen ari direla jakinarazi du. Osoko bilkuratik pasa eta gehiengo osoz onartu behar den hitzarmena, hain zuzen ere. Gaztetxekoei hainbat aukera eskaini zaizkiela ere nabarmendu dute “hitzarmena onartuko den bermea dutenak”.Udalak zehaztu duenez, egoitza gisa erabil dezaketen lokal bat eta biltegi gisa erabiltzeko espazio bat eskaini zaie, eta baita urtean zehar jarduerak egiteko hainbat espazio publiko ere.

“Gaur egungo lokala ez da aukera bat, arriskuan jartzen baitu Nogalera 2025 proiektua, gure herriarentzat garrantzi handikoa eta Burlatarentzat interes orokorrekoa den proiektua”, dio Udalak, eta Gaztetxekoak ere honekin ados daude, prest agertu baitira eraitsiko den lokala uzteko.

Azken hitzarmen proposamenean martxoaren 15erako irteera akordio bat zegoela baieztatu du Udalak, eta lokal berri baterako proposamena hilabete honetako Osoko Bilkurara eraman nahi zuten. “Gazteek ez dute onartu, baina Udalak hitz egiten jarraitzeko eta akordio batera iristeko aukera eta borondatea izaten jarraitzen du”, ziurtatu du Gobernu taldeak. “Hori jakinarazi zaie uneoro gazteei, inoiz ez baita aurreikusi indarrez gaztetxea husteko aukera”, dio Udalak.

Hala ere, Gaztetxeak kanpaina bat abiatu zuen martxoaren 15ean aurrera desalojo arriskua zegoela eta atzo Burlatako Udalean bi gazte kateatu ziren, eta han pasa dute gaua hainbat lagunen babesarekin. Udalak dio ekintzak erakundearen “funtzionamendu normala” ez duela oztopatzen eta askatzeko aukera eman die hala erabakitzen dutenean, eta haien esanetara jarri da suhiltzaileei deitzeko eta askatzeko beharrezko kudeaketak egiteko, baina uko egin diote. Protesta “legitimoa” dela dio, baina ez dute ulertzen zergatik ari diren horrela jokatzen negoziazioa irekita baldin badago.