ahötsa_

IPES Elkarteak antolatzen duen Zinema, Mundua eta Giza Eskubideen Erakustaldiak, bere XIX. edizioa izango du hurrengo astelehenetik ostiralera. Erakusketa hau duela 19 urte IPES Fundazioak, GOLEM Zinemek, Felipe Rinaldi Fundazioak eta Mugarik Gabe Nafarroak elkarrekin egindako proiektua da, aurten Nafarroako Gobernuaren babesarekin.

2024ko azaroaren 11tik 15era, Zinema, Mundua eta Giza Eskubideen XIX. Erakusketa izango da Iruñean. Erakusketa honek, giza eskubideen urraketa salatzea du helburu. Antolatzaileek azaldu dute, hemen eta mundu osoan, desberdintasunak, gatazkak eta giza eskubideak ez betetzearen aurrean zigorgabetasuna ikusarazten saiatzen direla, eta gizartea sentsibilizatu nahi dutela, itxita dauden begiak irekitzeko eta herritarrak aktibatzeko, gizarte hobea lortzeko bidean aurrera egiten jarraitzeko. Hau da, gobernuei giza eskubideen sustapena eta babesa eskatzeko gai izango den gizartea eraldatzen eta aurrera egiten jarraitzeko. “Giza eskubideen urraketei jaramonik ez egiteak kostu handia dakar gizartearentzat” gehitu dute.

Beraz, erakusketa honek, zinemak tresna eraldatzaile gisa duen ahalmena nabarmentzen du, aisialdirako ez ezik, izaera eraldatzaile handia duen tresna gisa, eskura ez genituzkeen beste istorio eta bizipen batzuetara hurbiltzeko gaitasuna duena.

Zuzendariak eta gonbidatuak

Aurten, lau zuzendari eta bi gonbidatu izango dira, proiekzioen ostean egingo diren eztabaidetarako:

Zuzendariak

• Amaia Merino: Indarkeriaren oi(h)artzunak [Los ecos de la violencia] filmaren zuzendaria, Ander Iriarterekin batera zuzendua, euskal gatazkaren memoria historikoa lantzen duena.
• Iñaki Alforja: 16060 egun [16060 días] film laburra aurkeztuko du, Naparra kasuari buruzkoa. Eneko Etxeberria, desagertuaren anaia, lagun izango du aurkezpenean.
• Juana Macías: Las chicas de la estación filmaren zuzendaria, pederastia sareei buruzkoa, eta protagonista den aktorea, María Steelman, ere bertan izango da.
• Georgina Cisquella: Dokumentalgile saritua, Dónde vamos a vivir. Mujeres contra el desahucio aurkeztuko du, etxebizitzaren drama eta etxegabetzeen aurkako borroka aztertzen dituena.

Gonbidatuak

• Begoña Pérez Eransus: UPNAko errektoreordea eta soziologia irakaslea, On Falling filma aurkeztuko du, kapitalismoaren sistema alienazio bortitzari buruzkoa.
• Lidón Soriano: Palestinako herriaren eskubideen aldeko ekintzailea, No Other Land dokumentala aurkeztuko du, Zisjordaniako okupazioari buruzkoa.

Sarrerak, www.golem.es webgunean edo leihatilan eskuragarri izango dira.