ahötsa_

AFEDE Antsoaingo jostailu denda bat da, eta 3 langile ditu guztira, dendako lan guztiaz arduratzen direnak. Dituzten lan baldintzak legediak ezartzen dituen gutxienekoak dira: lanbide arteko gutxieneko soldata kobratzen dute, urtean 1.900 ordu baino gehiago lan egiten dute, eta ez dute lan egutegirik, besteak beste.

Azaroaren 25etik greban daude “lan baldintzak hobetzeko eta lanetik bizi ahal izateko”, ELAk gogorazten duenez. %15eko soldata igoera, lanaldiak eta lanbide kategoriak murriztea eta erregularizatzea eta lan egutegia izatea eskatzen dute.

“Negozio errentagarria da, 300.000 eurotik gorako fakturazioa du Antsoaingo dendan eta denda gehiago irekitzen jarraitzen dute”, dio ELAk. Hala ere, AFEDEko zuzendaritza “negoziazioaren aurkako jarrera” izaten ari dela salatu du sindikatual. “Proposamenik ez egiteaz gain, langileak beldurtzen eta errespetua galtzen saiatzen dira. Are gehiago, oraindik 2024ko aparteko orduak zor dizkiete”, ziurtatu du ELAk.

Sei hilabeteko greban daramatzatenean, jostailu eta jokoen azoka txiki bat irudikatu zuten atzo Iruñeko San Frantzisko Plazan, “jokoaren arauak alda ditzagun” lelopean. “Ekintza honekin, jarrera aldatzeko eta negoziatzera esertzeko eskatzen diote enpresari, ez ikusiarena egiteagatik ez baita arazoa desagertuko”.
Gainera, mobilizazio gehiago iragarri dituzte, bai Iruñean, bai enpresak Donostian, Bilbon eta Urbilen dituen denden parean ere.