ahötsa_

LABen iritziz, Nafarroako Gobernuak “oraindik ez du kalitatezko arretarik bermatzen babesik gabe dauden adingabeei laguntzeko zerbitzuetan”. Hori dela eta, diru publikoarekin erabat finantzatzen diren enpresa edo fundazioek “arbitrariotasunez funtzionatzen” dutela salatu du sindikatuak, “eta horrek ez du inola ere laguntzen plantillak egonkortzen”.

“Aski ezaguna da gaur egun Xilema Fundazioak kudeatzen duen adingabeen baldintza-agiria oso urria dela, esku-hartze zuzeneko profesionalen kopuruari dagokionez. Izan ere, Nafarroako Gobernua ez zen gai izan LAB sindikatuak helarazi zizkien eskaerak eta beharrak entzuteko”, ohartarazi du LABek.

Xilema Fundazioak erabaki zuen baldintza-agirien gainetik Oinarrizko Egoitza Harreretan arratsaldeetan laguntzeko hezitzaile bat sartzea, hau da, guztira bost pertsona. “Orain, Xilema Fundazioak argudiatu du horrek gainkostu handia dakarkiola, eta ezin duela hori bere gain hartu, Gobernuak ez baititu figura horiek finantzatzen, beharrezkotzat jotzen badira ere”, esan du sindikatuak.

Xilema Fundazioaren Zuzendaritzak arrazoi ekonomikoak argudiatu ditu, baina Enpresa Batzordeari arrazoi hori justifikatzen duen dokumentu objektiborik aurkeztu gabe eta Batzordeari zenbaki bakar bati buruzko informaziorik eman gabe, argitu du LABek. “Azken bi urteetan galerak izan dituztela baino ez dute adierazi, hitzez gainera. Horrek ez du justifikatzen bost lanposturen amortizazioa, ez horixe”.

Xilemak dioenez, Gobernuak eskatzen zienaren gainetik jartzen aritu dira. “Jakina, diru nahikoa (publikoa, zergadun guztiena) Gobernuak injektatzen zielako, beste gauza batzuekin egiten duten bezala. Orain aurreztuko duten dirua da, zertara bideratuko duten ere ez dakigun diru hori bera; lehentasunen kontua”, kritikatzen du LABek.

Bestetik, kaleratze hauek beste ondorio bat izanen dute. “Hezitzaileei beren funtzioak eta lan-gainkarga areagotuko zaizkie. Honezkero, edonor konturatuko zen zerbitzuaren kalitateak okerrera eginen zuela”.

LABen iritzian, Gobernuaren esku hartzea ezinbestekoa da. “Nafarroako Gobernuak babesgabetasun-egoeran dauden adingabeei arreta emateko zerbitzuetan kalitatezko arreta bermatu gabe jarraitzen du. Gainera, oraindik ez du urratsik egin adingabeentzako gizarte-zerbitzuen baimenei, homologazioei eta funtzionamenduari buruzko dekretua arautzeko, eta gaur egun 1991koak indarrean jarraitzen du”.

Sektoreko hitzarmena irabazi ondoren, hurrengo ekintza-frontea langile-ratioak hobetzera bideratu ditu LABek “lanean osasuna galdu gabe eskaintzen dugun arretaren kalitatea hobetu dadin”. Eta hori bera egingo dute datorren astelehenean kaleratzeak salatzeko eta arreta ratio duinak eskatzeko egingo den mobilizazioan. Goizeko 11:30ean, Iruñeko Xilemaren bulegoen aurrean elkartuko dira.