Haserrea 112ko langileen artean faltsuki egotzi zaielako biztanleria zelatatzeko eginkizuna
Nafarroako Gobernuak, ohar baten bidez, SOS Navarra-112 zerbitzuan lan egiten dutenei “esleitu" egin die biztanleak kontrolatzeko lana, eta horrek haserrea sortu du langileen artean, batik bat euren "nagusien ezjakintasunagatik" eta Nafarroako herritarrek euren egitekoarekin izan dezaketen nahasmenagatik. LAB-ek eskatu die argibideak eta zuzenketak publiko egitea, baina Gobernuak ez du inolako zuzenketarik egin.
2020-ko maiatzak 19
Hilabete honen hasieran, Nafarroako Gobernuak prentsa-ohar bat zabaldu zuen SOS Navarra-112 zerbitzuak dronen bidez ustez egiten dituen kontrol-lanei buruz, herritarrek deseskalatze-prozesuan zehar egiten dituzten hutsegiteak detektatzeko. Bada, horren aurrean, Babes Zibileko LABeko atal sindikalak Nafarroako iritzi publikoari adierazi nahi dio informazio hori faltsua dela, erabat faltsua; SOS Navarra-112 aretoko langileok ez dugu egiten kontrol -eta zelatatze- lanik, ez dugu inoiz egin eta ez da gure zeregina.
Ez dugu ulertzen zer lortu nahi den informazio faltsu hori zabaltzearekin, baina argi geratzen da Lehendakaritza, Berdintasun, Funtzio Publiko eta Barne Departamentuak ez dakiela zer den Babes Zibilerako Zerbitzua eta zer lan egiten dugun. Nafarroako Babes Zibilari eta Larrialdien Kudeaketari buruzko Foru Legean ezarrita daude gure eginkizunak, eta gure nagusiek jakin beharko lukete. Ezjakintasun hori arduragabekeria galanta da, esan beharrik ez dago.
Babes Zibilerako Zerbitzuko eta Barne Zuzendaritza Nagusiko arduradunei eta Departamentuari jakinarazi diegu gure ezinegona eta eskatu ere eskatu diegu zuzenketa publikoa egitea, aretoan lan egiten duten langile gehienen izenean, batez ere herritarrek argi izan dezaten zein diren 112 zerbitzuaren zereginak eta, hala, Europako larrialdi-zenbakia erabiltzeko tenorean okerrik izan ez dadin.
Nafarroako Gobernuak erantzunik eta zuzenketarik eman ez duenez, herritarrei jakinarazi behar diegu 112 zenbakia larrialdietako arreta-zenbaki bat baino ez dela, eta dei horiei Nafarroako Gobernuak erantzunik eta zuzenketarik eman ez duenez, herritarrei jakinarazi behar diegu 112 zenbakia larrialdietako arreta-zenbaki bat baino ez dela, eta dei horiei erantzuten diegun langileok ez dugula egin, ez dugula egiten eta ez dugula egingo herritarrak kontrolatzeko lanik.