ahötsa_

Donibane auzo bizia eta egitasmo, proiektu, protesta eta gertakari ezberdinen eszenatokia izan dela gogoratu dute,eta azken hamarkadetan izandako hainbat gatazka, borroka eta lan dinamika herrikoiak gogora ekarri dute: Baguada parkean egin nahi zuten gasolindegiaren kontrako protestak, grebak, jaiak, ihauteriak, eraso sexisten aurkako mobilizazioak, euskaren aldekoak, euskal preso politikoen aldekoak, atxiloketen kontrakoak, apartheidaren aurkako milaka lagunen mobilizazio nazionalak edota eraildako bizilagunengatik egindakoak.

“Alta, ez da erraza izan auzo honetan euskalduna izatea, edo abertzale sentitzea, Euskal Herriaren aldeko lana egin eta auzoa eraldatu nahi izatea. Asko dira horregatik bizilagunok pairatu egin ditugun jazarpenak, auzo honen historia ezin baita ulertu euskal nazio askapen borrokarik gabe, askatasun grinarik gabe, konpromisorik gabe, bizilagunon arteko elkar zaintza eta komunitate sentimendu sendo bat gabe”, esan dute musika emanaldi honen antolatzaileek.

Guzti horrek euskal gatazkaren gordintasuna “modu oso gogorrean pairatzera eraman gaitu, auzoko belaunaldi ezberdinak markatu dituena”. Donibanen hamarnaka izan dira “kartzela, tortura edo erbestea ezagutu duten bizilagunak, ehunaka polizia ezberdinekin izandako gertakariak, isunak, kolpeak, mehatxuak edota zoritxarrez, lazgarrienak, gure bizilagunen erailketak”. Martxoa haientzat hilabete berezia dela ere aipatu dute. “Horrek guztiak auzo bezala markatu gaitu, gure karakterra markatu du, eta gure munduari so egiteko era, transformatu”.

Eta horregatik pairaturiko gertakari ezberdinak oroitzeko eta elkarren arteko une gogor horiek konpartitzeko espazioa bat sortzea erabaki dute. “Batzuetan, elkarrekin abestu, dantzatu eta gozatu beharra dugu. Zauriak itxi bai, baina batez ere oroimena oinarri, etorkizuneko Euskal Herria marrazteko, sentitzeko, bultzatzeko”.

Horretara dator Zuregatik Rock, otsailaren 25ean Atarrabiako Totem aretoan eginen den kontzertua, non Zartako, Arkada eta Afu musika taldeak arituko diren.