ahötsa_

Beste tokietan arrakasta handia duten arrazakeriaren aurkako mundialitoek Iruñerrira iritsi dira. Ekimen honen helburua arrazakeria, bere sustrai eta ondorioei aurre egitea da aisialdi eta kirol eremutik. “Gizarte desorekatu batean bizi gara. Desberdintasunari eusten dioten logiken artean, garrantzitsuenetako bat arrazakeria da: desberdintasunak izatea arrazatik, kulturatik edo jatorrizko herrialdetik abiatuta. Horri aporofobia gehitzen zaio, bazterketa-elementu gisa. Arrazakeriari aurre egitea lehentasunezko zeregina da edozein komunitate emantzipaturentzat”, adierazi dute antolatzaileek.

“Atzerritarren Legea, labirinto burokratikoak eta lan-prekarietatea gainjartzen diren elementuak dira, herritarren sektore oso bati eskubide sozialak ukatzeko: pertsona arrazializatuak, migratzaileak, errefuxiatuak. Horregatik, bi gizarte banatzen diren hiri batean bizi gara: alde batetik, eskubide osoko biztanleak; bestetik, pertsona guztien babesa izan beharko lituzkeen bermeen, babesaren eta askatasunen erregimenerako sarbide mugatua edo nulua dutenak”, aipatzen dute ekimen honen aurkezpenean.

Aisialdian, sarritan, bereizketa hori islatzen dela jakitun, buelta ematea proposatzen dute. “Elkartzeko, pilotaren inguruan denbora partekatzeko eta inguruko errealitateak ezagutzeko espazioak behar ditugu. Gure gizarte-zirkuluak eraldatu behar ditugu zerbait gehiago sortuz, anitzagoa den zerbait”.

Horregatik guztiagatik, datorren urriaren 1ean Iruñerriko I. Arrazakeriaren Aurkako Mundialitoa ospatuko da hiriko kantxa batean. “Diana Taurasiren erara magia egingo dugu, ukabilak altxatuko ditugu Sokratesen moduan, Alexia bezala jokatuko dugu eta Dick, Kerr ‘s Ladies eta Draymond Green bezalako lagunak egingo ditugu. Eta garrantzitsuena, gure hiria leku hobea egiten saiatuko gara, denok benetan jolasteko”, esan dute aurkezpenean.

Parte hartzeko, mundialitoirunerria@gmail.com helbidera idatzi daiteke.