ahötsa_

Iruñeko Udalak Txozna Gorriak jartzeko baimenak ukatu dituzte, auzoetako Jai Batzordeekin izenpetu duen hitzarmenean auzoko jaiak antolatzeko eta baimenak eskatzeko Jai Batzorde honi esleitzen zaiolako. Orain arte, Txozna Gorriak jartzeko baimena Jai Batzordearen bidez egiten zen, baina pasa den urtean jaiak pasa zirenean Mugimendu Sozialistarekin lotura duen jai gune honek Jai Batzordearen aurkako komunikatu bat kaleratu zuen jaietan izandako hainbat gertakariengatik, eta horrek hautsak harrotu zituen auzoan. Hortik dator Jai Batzorde eta Txozna Gorrien arteko haustura, nahiz eta aurretik ere harremanak oso tentsoak ziren.

Txozna Gorriek aurtengo gunea jartzeko baimena eskatu dute bere kabuz, eta Udalak eskaerari uko egin dio Jai Batzordearen esku geratzen delako espazioaren antolakuntza eta kudeaketa. Auzo bat, jai gune bat filosofia ezarri nahi du Iruñeko Udalak.

“Azken urteetan lau jaigune izan dira auzoko jaietan, eta bakoitzak bere ekarpena egin dio jaien eskaintza kultural orokorrari. Esperientzia hori baikorki baloratua izan delakoan gaude, eta horregatik zaigu hain ulergaitza auzoko jaiak gune bakar batera murrizteko irizpide berri hau, zeinak auzoaren errealitatearekin bat egiten ez duen eta jaietan parte hartzen dugun kolektiboekin kontsentsuatua izan ez den”, salatu du Txozna Gorriak-ek.

Txantreako jaiak hamarkadetan ezaugarritu dituen “izaera herrikoi eta parte hartzailea” errespetatu dezan eskatzen diote Iruñeko Udalari Txozna Gorrien gunea baimenduz.

Apirilaren 12an mobilizazio bat eginen dela ere aurreratu dute.