ahötsa_

Hatortxu Rock jaialdiaren azken edizioa ospatuko da uztailaren 24tik 27ra Lakuntzan. Elkartasun jaialdia aurrera eraman ahal izateko milaka eta milaka txanda egin beharko dira, eta antolatzaileek kanpaina bat jarri dute martxan horiek guztiak jendez betetzeko.
“Txanda horien guztien errepasoa egiten du Barnizek kantuan eta bideoklipean: barrako txandalariak, garbiketakoak, Gune Seguruko talde feminista, komunikazioko argazkilari eta bideogileak… DRRN arduratu da erritmo bizi eta dantzagarriak Barnizeko errimekin josten”, azaldu dute.

Peto laranja da Hatortxu Rockeko txandalarien elementu adierazgarriena. Eta elementu hori hartuko du sinbolo gisa Hatortxu Rocken gaur aurkeztu duten “Jantzi petoa!” kanpainak. “Auzolanaren aldeko mezua zabaldu eta uztaileko jaialdirako txandak lortzeko helburuak izango ditu”, aipatu dute. Barniz taldearen “Txandalari” kantuarekin abiatu da kanpaina, eta datorren apirilaren 12an, 11:30ean, Lakuntzan bertan, agerraldi masiboa egingo dute.