ahötsa_

Sare Herritarraren ordezkariek urtarrilaren 10ean Bilbon egingo duten mobilizazio handi baten berri eman dute gaur, “presoen eskubideak errespetatuak izan daitezen” eta “konponbidearen, bakearen eta elkarbizitzaren aldeko urrats berriak” eskatuz. Ekimenaren leloa argia da: “Ezin da gehiago luzatu”.

Azken urteotan aurrerapausoak egon badira ere –urruntze politikaren amaiera eta lehen graduaren atzean uztea, kasu–, Sareren iritziz oraindik ere bada zer aldatu. 2023az geroztik hobekuntza nabarmenak izan dira, baina oraindik ere dozenaka preso daude bigarren graduan eta askok ez dute baimenik edo irteera programarik, nahiz eta legeak ahalbidetzen duen.

Espetxe politika arrunt eta salbuespenik gabe baten aldeko aldarria izango da mobilizazioaren ardatza. Sareren esanetan, “zaila da ulertzen oraindik ere irizpide arbitrario eta diskrezionalak aplikatzea”. Horrekin batera, espetxe politikaren alde gizatiarrago eta progresiboago baten beharra aldarrikatu dute, presoen eskubideak oinarri hartuta.

Sareko ordezkariek azpimarratu dute euskal presoen eskubideen aldeko aldarria ez datorrela biktimen eskubideen aurka, baizik eta biek elkarrekin koherenteak izan behar dutela, eta horixe dela gizarte kohesiorako bidea.

“Egoera hau ez da ona inorentzat”, adierazi dute amaieran. Horregatik, urtarrilaren 10ean Bilboko kaleak berriro betetzea espero dute “bidearen azken zatia elkarrekin egiteko”.