Parlamentuak legez onartu du Ogasuneko langile guztiek produktibitate-osagarria jasotzeko duten eskubidea

2024-ko irailak 19

Erabakia Ogasunean egindako mobilizazioen ondorioz izan dela dio ELAk.

Parlamentuaren gehiengoak Langile Publikoen Estatutua aldatu du gaur, Ogasunaren produktibitate-osagarriari dagokionez, eta langile guztientzako osagarria onartu du, orain arte ikuskaritza-arloko langileek eta kudeaketa-arloko teknikariek bakarrik aitortuta zeukatenean.

“Langileen mobilizazioei, lanuzteei eta grebei esker” hartutako erabakia dela dio ELAk. “Hala ere, Estatutuan osagarria aitortzeak ez du esan nahi Ogasuneko langile guztiek kobratuko dutenik; beharrezkoa izango da Nafarroako Gobernuarekin negoziatzea aplikatzeko, eta ELAk ez ditu alde batera utziko eremuko gainerako aldarrikapenak: erosteko ahalmena berreskuratzea, plantilla handitzea, lan-kargak arintzea eta behin-behinekotasuna % 8tik behera murriztea”, ohartarazi du sindikatuak.

ELAk Ogasuneko langileak animatu ditu kalitatezko zerbitzu publikoa defendatzeko eta lan-baldintzak hobetzeko borrokan jarrai dezaten.

Gehiago