ahötsa_

Euskal Herrian 541.600 pertsonak dute enplegu prekarioa, eta horietatik 134.300 Nafarroan ari dira lanean, ELA sindikatuak emandako datuen arabera. Datu horiek hiru elementu kontuan hartuta lortzen dira: behin-behinekotasuna, soldata txikiak (18.200 eurotik beherakoak) eta lan-osasuna. Azken gai horri buruzko datuak zehaztea zaila bada ere, ELAk dio frogatuta dagoela “Nafarroan soldatapekoen erdiak baino gehiagok pairatzen dutela prekarietatea”.

Nafarroako ELAko koordinatzaile Imanol Pascualek prentsaurrekoan salatu duenez, patronalaren eta Nafarroako Gobernuaren artean erantzukizun partekatua dago. “Patronalak bere etekina handitzea baino ez du bilatzen lan-baldintzak prekarizatzearen kontura; eta Nafarroako Gobernua ez da behar adina neurri hartzen ari prekarietatearen aurka. Hain zuzen ere, Administrazioan sektore pribatuan baino behin-behinekotasun-tasa handiagoa dago, eta, gainera, KPIaren azpiko soldata-igoera aplikatzen ari da (2022an igoera % 2koa izango da)”, dio ELAko ordezkariak.

Eskualdeko arduradun Saioa Urrizak prekarietatearen erradiografia egin du, eta bereziki emakumeak, gazteak, migratuak eta dibertsitate funtzionala duten pertsonak kolpatzen dituela azpimarratu du. Horregatik, ELAk prekarietatearen aurkako plan bat landuko du lantoki guztietan, honako neurri hauekin: Europako gomendioei jarraituta, Euskal Herrirako gutxieneko soldata 1.381 eurokoa ezartzea, lanaldi partzialek dakarten pobretzea eragozteko asteko 20 orduko gutxieneko kontratua ezartzea eta lanaldi partzialak behi-betiko osatzeko betebeharra ezartzea enpresetan orduak libre geratzen direnean edo lan kargak handitzen direnean. Bestetik, azpikontratatutako langileek subrogazio eskubidea bermatuta izatea, eta iruzurrean dauden behin-behinekoen kaleratzeak indargabetzea. Bukatzeko, ELAk proposatzen du Administrazioek iruzur bidez kontratatutako 70.000 behin-behineko langileak kontsolidatzea eta kontratazioan iruzurrari aurre egiteko eta langileen lan osasun egokia bermatzeko ikuskari kopurua Europarekin parekatzea.

Imanol Pascualek azpimarratu du “beharrezkoa dela Gizarte Elkarrizketaren mugak gainditzea, azken lan-erreformak erakutsi baitu, beste behin, langile klasearen interesentzat kaltegarria dela”. Bere hitzetan, soldata-igoera defendatu behar da “pobretzea zabal ez dadin”. Horregatik, ELAk uko egin dio errenta-itun baterako deialdiari “azken finean, soldatak KPIa baino gutxiago haztea inposatu nahi delako, UGTren eta CCOOren bermearekin”.

Apirilak 6: ELAren ekitaldia eta manifestazioa, Bilbon
Bide beretik, ‘Lan prekarioa gehiagorik ez!’ lelopean, ekitaldi konfederala egingo du ELAk datorren apirilaren 6an, Bilboko La Casillan, eta bertatik abiatuko da ondoren manifestazioa. Aldi berean, 541.600 langile prekarioen zifrarekin kanpaina garatzen ari da Euskal Herriko kaleetan, eta webgune berezia ere eskainiko dio ELAk, prekarizazioaren inguruko datuak bertan herritarren eskura edukitzeko.