ahötsa_

LABen ustez, hiru enpresa horien jarrera miserablea da sektoreko emakume langileak miseriazko lan-baldintzetara kondenatzen baititu. Sindikatuak aurrera jarraituko du hitzarmen duin baten aldeko borrokarekin eta mobilizazioekin eta abenduaren 13 eta 20rako bi orduko lanuzteak egitera deitu ditu langileak.

Urtarrilean lau urte beteko dira LAB sindikatuak Nafarroako zahar egoitzen hitzarmena aldarrikatzeko lehen pankarta atera zuenetik. Lau urte luze eta malkartsu hauetan LABek, bakarrik edo beste sindikatu batzuekin, ehunka ekimen egin izan ditu (batzarrak eta bilerak, manifestazioak eta elkarretaratzeak, bide mozketak, lanuzteak eta grebak…) pribatizatutako zaintza sektore honetako langileen lan eta bizi baldintzak hobetzeko borrokan.

Bada, azkenaldian alde ezberdinen arteko jarrerak hurbiltzen ari ziren eta bazirudien elkar ulertzeko eta ados jartzeko borondatea bazegoela. Azken hilabeteetan, koherentziaz eta zahar egoitzetako langileen lan eta bizi baldintzen egoera behingoz arautzeko borondatearekin, elkarrizketa ezberdinak mantendu izan ditu LABek, negoziazio mahaian parte hatzen duten kide ezberdinekin. Horren ondorioz, bazirudien gutxieneko akordio bat lortzear zegoela. Baina iragan astean, sektoreko bi patronaletako baten enpresek bozkatu zuten ea akordioa sinatuko zuten, eta Amavir, Sanitas eta GSR enpresek, miserableki, ezezko botoa eman zuten. Hau da, egoera bideratzeko eta hitzarmena posible egiteko aukera errealak dauden momentuan, multinazional handiek erabaki dute atea danbateko batez ixtea.

LABek gogor salatu nahi du Amavir, Sanitas eta GSR enpresen erabakia. Berriz ere beren diru gose aseezina langileen eta egoiliarren ongizatearen gainetik jarri dute, eta urte luzeetako borrokaren ondoren alde gehienek elkarrizketarako eta negoziazioaren aldeko apustua egin dutenean, miserable hauek ezezkoa eman diote negoziazioari. Sektoreko langileak prekarizatzen, esplotatzen eta lan baldintza miserableak ezartzen jarraitzea erabaki dute miserable hauek.

Multinazional horien jarrera tamalgarri horren aurrean, LABek eskatuko du sindikatuko ordezkariak Nafarroako Parlamentuan azaltzea eta, halaber, abenduaren 13an eta 20an lanuzteak egitera deitu ditu zahar egoitzetako Nafarroako langileak, 16:00etatik 18:00etara. Lanuzte egunetan enpresa horiek zuzenean seinalatuko ditu LABek.

Borroka ez da bukatu. Hasieratik, edozein interes korporatibo baztertuta, hitzarmen hau lortzeko konpromiso sindikal eta politiko irmoa azaldu du LABek, eta konpromiso berdinarekin jarraitzen du. Urte hauetan guztietan langileek, delegatuek eta eragile sozial ezberdinek egin duten borroka harro egoteko modukoa da, eta zinez eskertzekoa. Eta batzuei zein besteei borroka horri eusteko eskatu die LABek. Tinko, momentuak eskatzen duen moduan, enpresa miserable hauei behar bezala erantzuteko.