ahötsa_

Gaur arte, Iruñeko Peñen Federazioak ez du izan peña guztien abesti komunik. Peña guztiek duela urte asko dituzte euren ereserkiak, baina denak batuko zituen abesti bat falta zen, eta gaur “Hamasei taupada” kanta aurkeztu dute, Goxua’n Salsa taldeak egindakoa.

2024 urtean sortu zen ideia eta gaur aurkeztu dute “Iruñeko peña sanferminero guztien abesti identitarioa” izatea espero dutena. Iruñeko Udalaren laguntza ekonomikoa izan dute euskaraz eta gaztelaniaz Ivan Luquek idatzitako abestia gauzatzeko.

Goxua’n Salsa taldeko abeslariez gain, peñetako hainbat lagunek jartzen diote ahotsa ereserki honi: Aritz Redin (Aldapa), Claudia Goicoechea (Muthiko Alaiak), Idoia Tapia eta Saioa Lizarraga (La Única) eta Urko Mirari (La Jarana).

Abestiak bideoklip bat ere badu, non peña guztietako pertsonek parte hartzen duten. “Parte-hartze hori anitza da, bai adinari dagokionez, bai generoari dagokionez, peñetan dagoen aniztasuna islatuz”, azaldu dute.

Bideoklipaz Sergio Elía arduratu da, bideoklip musikalen sorkuntzan eta grabazioan esperientzia duen Iruñeko musikaria. “Bideoan, hiriko hainbat leku enblematiko ikus daitezke, hala, peña guztiak irudikatzen dituztenak, bai Alde Zaharrean daudenak, bai hiriko auzo ezberdinetan daudenak”, nabarmendu dute. Rakel Arjol, Peñen Federazioko egungo presidentea, produkzioko buru izan da, eta abestiaren eta bideokliparen koordinazioaz arduratu da.

“Proiektu horretan lan handia egin dugu hilabeteotan, eta ilusio handia jarri dugu proiektu honetan. Horregatik, espero dugu peñetako bazkideei bereziki, baina, oro har, iruindarrei abesti hau gustatu eta hunkitzea, guk egin dugun bezala”.