ahötsa_

Euskalgintzako eragileak, herri mugimenduko hainbat kolektibo eta sindikatu batzuekin batera, datorren igandean Baionan euskararen defentsan manifestazioa egiteko deia luzatu dute. Euskararentzat eta euskaldunentzat “justizia” aldarrikatuko dute, eta “atzerapausorik” ez dutela onartuko eta “aurrera egiteko prest” daudela adierazi dute.

Iazko abenduaren 3an, Euskararen Nazioarteko Egunaren karietara, Euskal Herrian Euskaraz eragileko bi kide Baionako Justizia Jauregiko teilatura igo eta sarrerako horman, tinduz, “Justizia Euskararentzat” idatzi zuten.” Salatu genuen, frantziar eta espainiar konstituzioen baitan, euskaldunontzat ez dagoela justiziarik; hain justu, gure eskubideak behin eta berriz zapalduz, euskaraz bizitzea ukatzen digutela. Era berean, Euskal Herrian Euskarazetik argi dugun baieztapena jarri genuen berriro ere mahai gainean: egoera hau iraultzeko ezinbesteko dugula independentzia, Euskararen Errepublika”.

Desobedientzia ekintza hori gauzatu zuten bi kideek apirilaren 11n, ostiralez, epaituko dituzte. Hala, epaiketa aurreko igandean, apirilaren 6an, Baionako kaleak hartzeko deia egin dute. “Bi auziperatuekiko elkartasuna adieraztetik haratago, euskararentzat eta euskaldunontzat benetako justizia aldarrikatzeko. Alegia, Euskal Herri osoan euskara ofizial izan dadila aldarrikatzeko; hezkuntza euskalduna aldarrikatzeko; euskaraz epaituak izateko eskubidea aldarrikatzeko; euskalgintzara dirulaguntza publiko gehiago bideratzea aldarrikatzeko… Finean, euskaraz eroso eta aske bizitzeko eskubidea aldarrikatuko dugu“.

EHEko kideek uste dute euskara “larrialdi egoeran” dagoela eta euskaldunok “indar ugari ditugu kontrara. Hasteko, oldarraldi judizial, politiko eta mediatikobortitz bat, urteetako borrokari esker lortutako eskubideetan atzerapausoak eragin nahian. Hori guztia, oldarraldi orokorrago baten baitan ari da gertatzen; hain justu, jarrera faxisten eta eskuin muturrekoen gorakadaren testuinguruan”. Bestetik, gero eta mundu globalizatuagoan bizi garen honetan “merkatu logika kapitalista nahiz kontsumista nagusitzen” da eta homogeneizazio prozesuak “ikaragarri bizkortu” dira, eta guzti horrek “hizkuntza gutxiagotu oro” kaltetzen ditu.

“Alarmak jo ditugu eta, orain, egoera bideratzeko neurriko erantzunak behar dira; norbanakook eta eragileok ez ezik, instituzioek eman beharrekoak. Euskara lehen lerrora ekarri behar dugu eta zapalkuntzarik gabeko gizarte baten alde lanean dihardugunontzat tresna ezinbesteko bilakatu. Maila guztietan, ardurak hartzeko eta exijitzeko unea da”, dio EHEk.

Ildo horretan EHE prest agertu da “amesten dugun Euskal Herri euskaldun hori eraikitzen” jarraitzeko.