ahötsa_

Ikasketak aurrera eramateko garaian trabaz beteriko bide batekin egiten dute topo euskal herriko ikasleek. Ikasketak euskaraz egitea oztopoz beteriko bide bat salatzeko mobilizazioak antolatu dituzte martxoaren 23an. “Euskaraz ikasten dugula esaten den arren, hezkuntza prozesu hori ezin dugu sekula %100an euskaraz gauzatu: irakasle euskaldunen falta, euskarazko zerbitzu eza, euskaratu gabeko material didaktikoaren etengabeko erabilera, euskarazko ikasketa batzuen eskaintza eza… urtez urte pairatzen ditugun eskubide urraketak dira. Gainera, agerikoa da hezkuntza eredu honek ez duela euskararen jakintza eta erabileraren arteko ispilu edo berdintze gisa funtzionatzen”.

Hezkuntza eredu honek ez duela gazte belaunaldia euskalduntzeko gaitasunik agerian geratu dela diote, eta egoera horrekin kezkatuta daude. “Euskal Herrian euskarak bigarren mailako hizkuntza trataera jasan ezin duen modu berdinean, Euskal Herrian euskaldunok ezin dugu bigarren mailako biztanle izan. Martxoaren 23an dagokigun hezkuntza euskalduna aldarrikatzera aterako gara”.

Hezkuntza euskaldun bat bermatu dadin hainbat aldarrikapen kaleratuko dituzte mobilizazio egun horretan: Hezkuntza prozesua %100an bermatuko duen irakasle eta langile euskaldunen kontratazioa, erabiltzen diren eduki eta unitate didaktiko guzti-guztiak euskaratuta egotea, hezkuntza eremua euskaldundu bat, paisaia linguistiko euskaldun osoa ahalbidetuko duena eta Euskal Herrira egokitutako hezkuntza eredua eskaintzea.

Hezkuntza euskaldun baten eskubidearekin bat egiten duten eragile zein hezkuntza komunitateko kide guztiei dei egin diete mobilizazio hauetan parte hartzeko.