ahötsa_

Atzo, martxoak 23 igandea, “Erriberan Euskaraz Elkartea” aurkeztu zen Arkedasko Virgen del Yugon. Nafarroako Erriberako hainbat herritako pertsona eta kolektiboek sortu dute irabazi asmorik gabeko elkartea. Bere helburu nagusien artean, eskualdean euskara sustatzea dago. Lehen ekitaldi ofizial gisa, elkarteak Erriberako Euskararen I. Eguna izango dena aurkeztu zuen.

Elkarteko ordezkariek atzo emandako prentsaurrekoan azaldu zutenez, iaz Korrika Erriberatik igaro zenean hainbat herritan izandako ilusioaren ondorioz sortu zen ekimena. Esperientzia hark Korrikaren inguruko kultur eta jai jarduerak antolatzera bultzatu zituen herriak, eta ilusio horrek bultzada eman zion euskarak eskualdean merezi duen lekua izan dezan lanean jarraitzeari.

Horrela sortu zen Erriberan Euskaraz Elkartearen sorrera ekarri duen jai-eguna antolatzeko hainbat udalerri batzeko ideia. Elkarte honetan Arkedas, Kabanillas, Kastejon, Korella, Fontellas, Milagro, Tutera eta Alesbeseko pertsonek eta kolektiboek parte hartzen dute. Erriberan euskaraz elkartetik beste udalerri batzuetako pertsona eta elkarteei Euskararen Egunean parte hartzeko deia luzatu diete. Leire Legarretak, haiek duten ilusioa gainontzeko herrietara kutsatu nahi dutela gaineratu zuen, Erriberako jendea euskararen alde batu dadin.

Erriberako hainbat herritan euskararen aldeko egunak antolatu izan badira ere, ekitaldi honen berezitasuna eskualdekoa eta elkarlanekoa izatea da. Lehen aldiz, ospakizuna Erriberako herriak elkartzeko eta batzeko egun gisa planteatzen da, tokiko jarduera baten ordez, eskualde osoari zuzendutako egun berezia izango da.

Carmen Casasek, elkartetik, adierazi zuen lehenengo edizio hau maiatzaren 17an egingo dela Arkedasen, eta egun berezi hori ez galtzeko data gordetzera animatu zuen,horrez gain, Arkedasko Udalari eskerrak eman zizkion haien prestutasun eta lankidetzagatik. Era berean, elkarteak adierazi zuen haien nahia jaia egonkortzea dela, eta bi urtero ospatzea dela intentzioa herri ezberdinetatik pasatuz.

Programazioari dagokionez, xehetasun guztiak argitu ez ziren arren, jardunaldia goizeko lehen orduan hasiko dela eta egun osoan zehar publiko orori zuzendutako jarduerak eskainiko dituela baieztatu zuten. Proposamen espezifikoak egongo dira haur, gazte eta helduentzat. Era berean, Erriberako kultur taldeek jaiaren egitarauan parte hartu izana eskertu zuten eta haien garrantzia azpimarratu.

Gainerako programazioaren berri datorren hilabetean emango da. Antolatzaileek elkartearen Instagram profila (@erriberan.euskaraz) jarraitzera animatu zituzten herritarrak, bertan informazio eguneratua argitaratuko baita. Gainera, Erriberan Euskaraz-en kamiseta eta zapi gorri ofizialak salgai daudela iragarri zuten. Instagrametik edo Tuterako Arrigarai euskaltegian enkargatu daitezke eta Erriberako hainbat tokitan jaso ahal izango dira.