ahötsa_

Iturria: Erran.eus – Argazkiak: Josu Inziarte

Plataformak adierazi zuenez, «hamarkada bat baino gehiago da Baztan-Bidasoa lanbide eskola bateratu, erreferente, indartsu eta euskaldun bat aldarrikatzen ari dela. 2015ean Nafarroako Parlamentuko Hezkuntza Batzordeak Elizondoko egoitza ‘egoera tamalgarrian’ zegoela adierazi bazuen, 2025ean erran dezakegu egoera jasan ezinean dagoela. Modu berean, Berako Toki-Onako zikloetan ere ez da inbertsio esanguratsurik egin. Horrek adierazten du Nafarroako Hezkuntza sailak Baztan-Bidasoko lanbide heziketa bigarren mailako bezala tratatu izan duela».

Bitartean, «eskualdeko lanbide heziketa, udalak eta eragileak ez gara geldirik egon. 2016an kokalekua adostu zuten, hemen bertan, eta 2018an hezkuntza eskaintza. Ez zen lan erraza izan baina eskualdeak zuen premiaren ondorioz ahots bakarrarekin aurkeztu ahal izan ginen Hezkuntzaren aurrean. Beharra ongi justifikatuta, proiektua borobilduta eta eskualdeko batasuna ikusita, proiektuari baiezkoa eman zioten».

Ordutik «bidea luzea izan da eta gorabehera aunitzekin. Lekarozko Kiroletako zikloa eskualdetik eramateko arriskuan zegoenean, Elizondok bere egoitzan hartu zuen. Leku falta izanagatik, Hezkuntzak eskualdeari goi mailako ziklo gehiago jartzeko aukera zabaldu zionean (Europatik zetorren dirua ezin kokatuz zebiltzalako) baiezkoa eman zitzaien. Jakitun ginen ez zirela baldintzarik onenak baina eskualdeari aukerak guttitan zabaltzen zaizkiola ikusita ez genuen zalantzarik izan, gainera, Oronozko lanbide eskola berria atean omen genuen».

2023ko otsailean, «lau urteren ondotik, Carlos Gimeno Hezkuntzako Kontseilariak proiektua aurkeztu zuen. Legegintzaldi berriarekin, aldiz, laino ilunak bata bertzearen gibeletik etorri ziren. 2024ko martxoan obraren lizitazioa hutsik gelditu zen, interesa azaldu zuten enpresen erranetan finantziazio eskasa zuelako. Hutsik gelditu izana prentsa bitartez jakin genuen eta orduan hasi ziren hilabete beltzenak. Hezkuntzako Kontseilariak Berako eta Baztango alkateekin bakarrik bildu nahi izan zuen eta urrian jakin genuen Nafarroako Gobernuak hiru hilabete lehenago obraren exekuzioari finantziazioa kendu ziola».

Proiektua galtzeko arriskuaren aitzinean, «Baztan-Bidasoko lanbide eskola berriaren sustatzaileok martxan jarri ginen; informazio kanpainak, elkarretaratzeak, itxialdiak, mozioak, Parlamentuan agerraldia… Horren ondorioz proiektua zulotik ateratzea lortu genuen eta 2025eko Nafarroako aurrekontuen harira, PSNk eta EH-Bilduk proiektua berrabiarazteko akordioa sinatu zuten».

Proiektua berrabiarazteak, ordea, «eginda genuen bidea berriz egitera behartu gintuen. Eskola berriaren hezkuntza eskaintza Nafarroako Hezkuntzarekin adosteko, eskualdeko ordezkaritza bat onartu zen: Bera, Lesaka, Doneztebe eta Baztango Alkateak eta Toki-Ona eta Elizondo Lanbide Eskolako Zuzendariak».

Otsailera arteko epea izan zen eskaintza adosteko, «Hezkuntzako arduradunen erranetan, 2025-2028 epe ertaineko aurrekontuetan obrari finantziazioa bermatu behar bazitzaion, beranduenez martxoan proiektu berria lizitaziora atera beharko zutelako. Eskualdeko udal guztiek, Toki-Ona eta Elizondo Lanbide Eskolak, Doneztebeko Nafar Lan Sarek eta Cederna-Garalurrek berriz ere adostutako eskaintza bat aurkeztu zuten. Hezkuntzak ongi landutakoa zela erran bazuen ere, inongo arrazoi tekniko, pedagogiko edo datuetan oinarritu gabe, eskaintza murritzagoa izango zuen bigarren proposamen bat aurkezteko eskatu zuen. Hortaz, otsailaren 18an, 14 ziklo zituen bigarren eskaintza bat aurkeztu genuen».

Geroztik, ordea, «Hezkuntzaren isiltasuna erabatekoa izan da. Proiektu berria lizitaziora ateratzeko martxoa akitzen ari zela ikusita, alarma gorria piztea erabaki genuen berriz ere, mobilizazioei ekinez. Eta hara non, ortzirale arratsaldean jakin genuen mugitu behintzat egin dela. Mugimendu berri honek eskualdearen beharrak noraino asetzen dituen aztertu behar badugu ere, argi dugu batetik Carlos Gimenok erreferentziazko D ereduko lanbide eskolarik ez duela nahi eta beraz aurrerantzean ere egin beharreko bidea erraza ez dela izanen. Baina, era berean, argi dugu Baztan-Bidasoarentzat lanbide eskola berri eta duin bat lortu arte ez dugula etsiko eta beraz egoera bakoitzak eskatzen dituen dinamikei ekinen diogula».