ahötsa_

@IonOrzaiz, BERRIA

Aspaldiko partez, “Pamplona”-z gainera, “Iruña” ere irakur daiteke Nafarroako hiriburuko sarbideetan. Izan ere, Nafarroako Gobernuak elebiz paratu ditu bide-seinaleak, euskalgintzaren aldarrikapen zahar bati erantzuna emanez. Hain zuzen, Iruñeko Euskalgintzak “lorpena” izan dela nabarmendu du, aspaldiko eskaera izan baita.

2014an kanpaina egin zuen Euskalgintzak gaztelania hutsez zeuden kartelak alda zitzaten eskatzeko: “Izena gaztelania hutsean egonik, hiriaren izaera euskalduna ezkutatzen zen, Euskararen Legeak ezarritakoa urratzeaz gain”.

Bestalde, Nafarroako Gobernuaren erregistroan eskaera egin zuten, artean Yolanda Barcina presidente zelarik: “Isiltasunaren aurrean, Nafarroako Arartekoaren bulegoan kexa aurkeztu genuen”. Arartekoak arrazoia eman zien: bi izen ofizialak jarri behar zituen Gobernuak.

Kartelak euskaratzeko prozesua UPNren agintaldian hasi zen: 2015eko martxoan. Exekutiboak sei bide seinale aldatu zituen orduan. Gobernu berriari plangintza hori bukatzea egokitu zaio, eta halaxe egin du azken hilabeteetan: 2015eko urrian lau kartel aldatu zituen eta 2016ko apirilean, berriz, hiru kartel. Euskalgintzako kideek ohar batean adierazi dutenez, kanpaina “arrakastatsua” izan da, aspaldiko helburua lortu delako. “UPNren Gobernuak euskararen aldeko neurri hori hartu bazuen espero dezagun aldaketaren Gobernua ere legegintzaldia amaitu baino lehen euskararen aldeko neurriak hartzeko gai izatea”, diote.