“Azkena” jaialdia ospatuko da irailaren 18an Barañainen errepresaliatuen alde egindako lana aitortzeko
Datorren irailaren 18an, Azkena jaialdia ospatuko da Barañainen, hainbat hamarkadatan zehar euskal preso politiko, errefuxiatu eta iheslarien defentsan herri horretan egindako lana aitortzeko. Edu Zardoya bakarlariak, Argi ta Garbi, Aingura eta Irati 58 taldeek parte hartuko dute. DJok In-ek goizeko 6:00ak arte luzatuko du jaialdia.
2026-ko abuztuak 25
Antolatzaileen hitzetan, “sakabanaketaren, inkomunikazioaren eta torturaren ankerkeria urte horietan ezagutu dugu. Baina, batez ere, egindako lana iraunkortasunaren eta kemenaren eredu izan da.”
Beraz, agertoki politiko eta sozial aldakor baten aurrean, “atzera begiratzeko eta aurrerapausoak emateko unea da”, jaialdiaren antolatzaileen hitzetan.
Hasiera gaueko 21:00etan izango da Barañaingo Eden aretoan eta Edu Zardoya kantautoreak, Argi ta Garbi, Aingura eta Irati 58 taldeek parte hartuko dute. DJok In-ek goizeko 6:00ak arte luzatuko du jaialdia.
Sarrerak 10 eurotan daude salgai datozen egunetan Iratxo Tabernan (Barañain) eta Aigeluerreka Elkartean (Agoitz).
Hemen ere eskuratu ahal izango dira online: https://labur.eus/glvnw8tz.
Jaialdiaren antolaketaren helburua «presorik, erbesteraturik eta deportaturik ez egotea» da, ahalik eta lasterren.
